אֶל אֱלֹהֵי נַפְשִׁי אֲנַהֵל / ר' משה אבן עזרא

סימן: א'ב (משולש), משה קטן (משולש)

 

אֶל אֱלֹהֵי נַפשִׁי אֲנַהֵל –

אוּלַי אוֹר סְלִיחָתוֹ יָהֵל,

אָכֵן מִפָּנָיו אֶבָּהֵל

   אֶתְבּוֹנֵן וְאֶפְחַד מִמֶּנּוּ:                        איו' כג, טז

 

בְּפַחַד קַמְתִּי וְנָפְלוּ פָנָי

בְּאֵד קְרָבַי נָזֹלּוּ עֵינַי

בְּאֵימָה בָאתִי לִפְנֵי אֲדֹנָי

   גָּדוֹל וְנוֹרָא מְאֹד וּמִי יְכִילֶנּוּ:              יוא' ב, יא

 

גְּלוּת צְפוּן לִבִּי אוֹאֵל

גֵּר אָנֹכִי עַל דֶּלֶת שׁוֹאֵל

גָּר מִפַּחְדּוֹ, כִּי יָקוּם אֵל

   וְכִי יִפְקֹד מָה אֲשִׁיבֶנּוּ:                       איו', לא, י

 

דַּלּוֹתִי לְיוֹם אֱהִי בוֹ נִשְׁפָּט

דַּלּוּ עֵינַי לְיוֹשֵׁב עַל הַמִּשְׁפָּט

דּוֹמֵם אֶהְיֶה בְעָמְדִי לְמִשְׁפָּט

   כִּי לֹא אִישׁ כָּמוֹנִי אֶעֱנֶנּוּ:                    שם ט, ל

 

הָאֵל, עֲוֹן נְעוּרַי אַל תִּשְׁמְרֶנּוּ

הֶבֶל כָּל אָדָם וְאֵיךְ תִּבְחָנֶנּוּ –

הֶרֶף, מָה אֱנוֹשׁ כִּי תִזְכְּרֶנּוּ

   וּבֶן אָדָם כִּי תִפְקְדֶנּוּ:                           תה' ה, ה

 

וּלְאַט לְשִׁכּוֹר בְּעוֹלָם בְּלִי יָיִן

וְיִסְכַּל כִּי עָשְׁרוֹ כְאָיִן

וּזְכוֹר כִּי נִבְהָל לַהוֹן אִישׁ רַע עָיִן

   וְלֹא יֵדַע כִּי חֶסֶר יְבֹאֶנּוּ:                     מש' כה, כב

 

זְהָבוֹ כְעָפָר יִהְיֶה וְהוֹנוֹ,

זוֹחֵל עַל מַעֲשֵׂהוּ וְקִנְיָנוֹ

זְמָן יֹרִשֶׁנּוּ מִבִּטְנוֹ

   חַיִל בָּלַע וַיְקִאֶנּוּ:                                איו' כ, טו

 

חָסְנוֹ יִדַּל וְעֻזּוֹ יְשֻׁנֶּא

חֵילוֹ יֹאבַד וְכָל אֲשֶׁר הוּא קוֹנֶה

חֲמוּדוֹ יִקְרָא וְלֹא יֵעָנֶה

   מִצָּרָתוֹ לֹא יַצִּילֶנּוּ:                             ישע' מו, ז

 

טֹרַף עֹשֶׁר, כְּרָקָב יְחֻבַּל

טְחוּן פָּנִים לַקֶּבֶר יוּבַל

טוּבוֹ יִמְאַס וִיהִי כְנָבָל

   וּבַחֲצִי יָמָיו יַעַזְבֶנּוּ:                            ירמ' יז, יא

 

יִצְבֹּר כְּחוֹל יַמִּים כֶּסֶף

יֶלֶד יוֹם אוֹתוֹ יְשַׁסֵּף

יוֹם תְּבֹאֵהוּ שׁוֹאָה וְלֹא יֵאָסֵף

   עֵינָיו פָּקַח וְאֵינֶנּוּ:                               איו' כז, יט

 

כְּבוֹדוֹ יָעוּף כַּקַּשׁ לְפָנָיו

כִּידוֹ יִרְאוּ עֵינָיו

כְּפֶתַע, קוֹל פְּחָדִים בְּאָזְנָיו

   בַּשָּׁלוֹם שׁוֹדֵד יְבוֹאֶנּוּ:                         שם טו, כא

 

לְתֵבֵל אֵל תִּצְעַד צָעֹד

לְיָפְיָהּ אַל תָּרוּץ לַחֲמֹד

לֵב הַכְנִיעַ וְתִתְמֹךְ כָּבוֹד

   וְגַאֲוַת אָדָם תַּשְׁפִּילֶנּוּ:                        מש' כט, כג

 

מְאַס צוּף פִּיהָ וְשִׂיחָהּ

מִהְיוֹת נִפְתֶּה בְרוּחָהּ –

מִי פֶתִי הִטַּתּוּ בְּרֹב לִקְחָהּ

   בְּחֵלֶק שׂפָתֶיהָ תַּדִּיחֶנּוּ:                      מש' ז, כא

 

נוֹצַר אִישׁ לֶעָמָל חָיָה,

נַפְשׁוֹ תֹאבַד וְאַחֲרִיתוֹ צִיָּה,

נִפְלָאוֹת יִדְרֹשׁ וְרָחוֹק מַה שֶּׁהָיָה

   וְעָמֹק עָמֹק מִי יִמְצָאֶנּוּ:                      קה' ז, כד

 

סוֹד יוֹצְרוֹ אֵיךְ יִהְיֶה מֵעִיר

סַף לִפְנֵי שֶׁמֶשׁ כְּעַל דֶּשֶׁא שָׂעִיר? –

סָכָל לֹא יָדַע לָלֶכֶת אֶל עִיר

   עֲמַל הַכְּסִילִים תְּיַגְּעֶנּוּ:                       שמ י, מד

 

עֵרוֹם מִסּוּת הַשֵׂכֶל וּבַעַר

עִוֵּר יְמַשֵּׁשׁ לִמְצֹא שַׁעַר

אִוֶּלֶת קְשׁוּרָה בְּלֶב-נָעַר

   שֵׁבֶט מוּסָר יַרְחִיקֶנָּה מִמֶּנּוּ:               מש' כב, טו

 

פַּחֲדּוּ מִיּוֹם יַכְבִּיד שִׁבְרוֹ

פְּנוּ אֶל צֶדֶק מַאֲמָרוֹ –

פִּתְאֹם יוֹם יָרֵחַ לֹא יָהֵל אוֹרוֹ

   וְשֶׁמֶשׁ בֶּעָנָן אֲכַסֶּנּוּ:                            יחז' לב, ז

 

צְעַד אֶל יֹשֶׁר נְקִי כַפָּיִם,

צְבֹר חֶסֶד טְהָר-יָדָיִם,

שַׁלַּח לַחְמְךָ עַל פְּנֵי הַמָּיִם

   כִּי בְרֹב הַיָּמִים תִּמְצָאֶנּוּ:                   קה' יא, א

 

קַנֵּא לְיוֹנָה קְצוּצַת אֵבֶר

קוֹנְנָה בְּפַח יָגוֹן וָשֶׁבֶר

קְהַל בָּנֶיהָ יָשִׂישׂ אָל קֶבֶר

   הַמְּחַכִּים לַמָּוֶת וְאֵינֶנּוּ:                      איו' ג' כא-כב

 

שִׁרְיָן תִּלְבַּשׁ לְעֶזְרַת אֲנוּשִׁים

שְׁלַח יָדְךָ לַהֲמוֹן יְקוּשִׁים

שׁוֹפֵט, קַנֵּא לְמוֹשֵׁל בַּאֲנָשִׁים

   צַדִּקִים וְטֹבִים מִמֶּנּוּ:                         מל"א ב, לב

 

תַּמּוּ חֲסִידַי וְגָבַר צָרִי –

תָּעִיתִי וְהוּא בֵּין אַחִים יַפְרִיא

תָּמַהְתִּי כִּי כָרַע שָׁכַב כַּאֲרִי

   וּכְלָבִיא מִי יְקִימֶנּוּ:                            במד' כד, ט

 

מִכְמַרְתּוֹ תִהְיֶה פָעֳלוֹ

מַהֵר יֶאֳרֶה פְּרִי מַעֲלָלוֹ

מַשְׂטִין יְפַתֵּהוּ וְאוּלַי נוּכְלָה לוֹ

   וְנִקְחָה נִקְמָתֵנוּ מִמֶּנּוּ:                        ירמ' כ, י

 

שִׁקְרוֹ לְנֶגֶד פָּנָיו הִצִּיבוֹ –

שָׁת בַּשָּׁמַיִם פִּיהוּ וְנִיבוֹ,

שָׂח: מַה נּוֹעִיל כִּי נִפְגַּע בּוֹ

   וּמַה שַּׂדַּי כִּי נַעַבְדֶנּוּ:                           איו' כא, טו

 

הֲמוֹן פְּסִילָיו אוֹתוֹ יַפִּילוּ

הֶמְיַת אֲמָרָיו פְּעָמָיו יַכְשִׁילוּ –

הַיּוֹם כְּמָרָיו עָלָיו יָגִילוּ

   עַל כְּבוֹדוֹ כִּי גָּלָה מִמֶּנּוּ:                      הו' י, ה

 

קִרְיַת חָנָה וּפִנּוֹת מִקְדָּשׁ

קָדוֹשׁ אֲשֶׁר בִּצְדָקָה נִקְדָּשׁ –

קֹרָא לָךְ שֵׁם חָדָשׁ

   אֲשֶׁר פִּי אֲדֹנָי יִקָּבֶנּוּ:                          ישע' סב, ב

 

טוּבוֹ יַרְאֵהוּ מַאֲוַיָו

טְהוֹר פָּעֳלוֹ יְחַוֶּה בְּחַיָּיו

טוֹב אֲדֹנָי לְקֹוָו

   לְנֶפֶשׁ תִּדְרְשֶׁנּוּ:                                    אי' ג, כה

 

נוֹרָא, סְעַד יְמִין נוֹקָשׁ

נָאוֹר, הַיְשַׁר לְפָנָיו דֶּרֶךְ נֶעֱקָשׁ

נְבוּאַת בָּעֵת הַהִיא יְבֻקַּשׁ

   אֶת עֲוֹן יִשְׂרָאֵל וְאֵינֶנּוּ:                       ירמ' נ, כ

 

 

לתוכן הענינים

לדף הראשי של פרויקט בן-יהודה